سعوديات غير شِكِل! 2

الفصل الثاني: نشاط اجتماعي خيري

المشهد الأول:

عصر اليوم التالي. مدام ريري نسيت موضوع الفرح الذي لم تُدعَ إليه لأن إحدى سيدات الأعمال المرموقات قامت بعمل خيري جليل جعل المدينة كلها تتحدث عنها. مدام ريري على التلفون تتحدث بعصبية مع مستشارها الخاص.

 مدام ريري: يا عصام لازم تشوف لي حل….مو معقول أخلّي وحدة زي هيا حسيني تاخد الشو كله السنة دي…..أبغاك تشوف لي عمل خيري أوريجينااااااااال…يعني إنت مستشاري الخاص عالفاضي…منتى بتاخد راتب كل شهر؟

عصام: يا مدام هدّي أعصابك و خليني أفكر زي الناس..

مدام ريري: أقول لك…. تعال لي البيت أحسن….بس لا تيجي إلا و عندك فكرة جنان!!

 

المشهد الثاني:

عصام في قصر مدام ريري و عنده فكرة جديدة يحاول أن يقنع بها ريري.

 

مدام ريري (بعصبية و استنكار): يعني تبغاني أجمّع لي كم بنت و ولد هايفين حوليا و أصرف عليهم عشان أكسب ثقة الشباب الجدد؟ إنت أكيد اتجننت!!!

عصام: يا مدام أنا ما قلت تصرفي عليهم من غير دراسة…بعدين إنتِ أساسا ليكي معجبات من البنات الصغار…يصير ليش ما تستغلي هادا الشي….و جمهور الشباب أقوى جمهور…

مدام ريري: طيب طيب …كمّل لي موضوع التمويل هادا…كيف تبغاني أصرف من غير ما أخسر؟

عصام: إنت في البداية حا تصرفي شوية…شوية بس….عشان الدعاية و الإعلان و الحاجات دي….(يقف عصام بطريقة استعراضية و عيناه تنظران للبعيد)…مشروع إعانة الشباب…….بالبنط العريض.. …لديك مشروع؟ نحن نكفل لك النجاح…نرعى المواهب الشابة و نأخذها إلى بر الأمان….إيش رأيك؟

مدام ريري (متململة): طيب و أنا إيش أستفيد من هادا كله؟

عصام: شوفي يا مدام….. المرحلة الأولى نسوي الإعلان هادا و طبعا الشباب و البنات حايجوكي جري….المرحلة التانية…بعد ما يجو….لازم يدفعو مبلغ معين عشان نوجههم التوجيه الصحيح….انا و كام واحد من الموظفين نعطيهم محاضرات عالماشي…هما صغار و إيش فهمهم ….بعد فترة من المحاضرات و الارشادات إللي كلها كلام في كلام….نوظف كام واحد و وحدة منهم…..خصوصا البنات عشان قضية المرأة هي إللي ماشية اليومين دي….المرحلة التالتة…

مدام ريري: يوووووه!!!….أنا صدّعت خلاص لسة في مرحلة تالتة ورابعة؟؟….(تصمت و تفكر قليلا)….أقولك ….أنا عندي فكرة أحسن …إنت مو تقول جمهور الشباب هو المهم؟…طيب… أنا أجيب لي كم بنت حلوة و أخليهم يعملو عرض أزياء…فكرة قديمة شوية…لكن أنا حازود عليها حاجة…. عرض أزياء يعملوه الشباب كمان…و يكون ريع عرض الأزياء خيري….و طبعا حاأعطي للجمعية 20% منه و الباقي آخده أنا و أسوي بيه مشروع تاني!!

عصام: قصدك يعني …الستات يتفرجوا على الشباب و هما بيعرضو الأزياء؟ ما نتي شايفة إنه هادا كتير شوية؟

مدام ريري: لا كتير و لا حاجة… مو إحنا بنشوف الرجال في الشارع؟…فيها إيه لما يلبسوا على آخر موضة و نشوفهم؟ بعدين هادا عمل خيــــــــــــري! وحا أعملوا هنا في بيتي …مين يقدر يمنعني؟

عصام (يحك رأسه في حيرة): و الله يا مدام ما أعرف إيش أقول لك …بس العواقب ما حاتكون سليمة…أخاف….

مدام ريري (تقاطعه): لا تخاف و لا حاجة…خليهم يروحوا يمسكوا الناس إللي بيسووا بلاوي في الشاليهات…بعدين أنا كده بأضرب عصفورين بحجر……و مو عصفورين بس ..يمكن اكتر…

عصام (أسقط في يده): كيف يعني؟

مدام ريري: أشجع الشباب و البنات الحلوين و أشغلهم….أسوي حاجة ما حد قدر يسويها قبلي ….يعني الصحافة كلها حاتتكلم عني و عن إنه كيف المرأة السعودية وصلت لأرقى المستويات و كيف إنه نحن صرنا متحررين…صدقني ….حتى أوبرا حا تتكلم عني!…

عصام: بس يا مدام…

مدام ريري: و طبعا حايكون كله لله و عمل خيري للأيتام …يا حراااام …يعني هما ما لهم حق في هادي الحياة زيّنا؟

عصام: (و قد بدأ يقتنع بالفكرة)…إيش رأيك قبلها تسووي مؤتمر صحفي؟ كمقدمة و تمهيد يعني؟ بس للستات ….عشان لا تقلبي الناس عليكي دفعة وحدة!

مدام ريري: و الله فكرة…..يلا بسرعة…جهز لي خطاب….(تتصل بالتلفون على نانسي)…..نانسي…كلمي لي كابي رعد خلي يجي عندي اليوم او بكرة بالكتير….أبغاه يصمم لي فستان ما حصل…يلا يا عصام روح إنت بالسلامة شوف شغلك….و خليني انا أتفرغ للنيو لوك تبع المشروع الجديد….

(يخرج عصام بدون أن تلاحظ ريري لأنها مشغولة تكلم نفسها)….

لازم يكون شكلي على مستوى الحدث….جميلة و أنيقة…و لازم كمان أظهر بمظهر محترم عشان يمشي مع فكرة العمل الخيري….(على وشك أن تفقد صبرها)….يا الله يا كابي….يا ريتك تقدر تيجي الليلة عشان أشوف إيش حا ألبس في المؤتمر!

 

Advertisements

5 thoughts on “سعوديات غير شِكِل! 2

  1. اعتقد انه ماتكتبينه مستوحى من الواقع , صح؟ . لاني فعلا قرأت عن اشخاص كثر يقومون بفعل الخير للصيت و السمعة بين الناس وليس لفعل الخير وهم موجودن في كل انحاء العالم !!!

    بانتظار الاجزاء الباقية 🙂

  2. تعقيب: سعوديات غير شِكِل! « مها نور إلهي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s